Sansoni dhe Delilaha

Gjyqtarët 16:4-22 4 Mbas kësaj ra në dashuri me një grua nga lugina e Sorekut, që quhej Delilah. 5 Atëherë princat e filistenjve shkuan tek ajo dhe i thanë: “Bëje për vete dhe zbulo ku qëndron tërë ajo forcë e madhe e tij, në mënyrë që ta mposhtim për ta lidhur dhe për ta nënshtruar; pastaj do të të japim secili një mijë e njëqind sikla argjendi. 6 Kështu Delilaha i tha Sansonit: “Më thuaj të lutem, ku qëndron forca jote e madhe dhe në çfarë mënyre mund të të lidhin që të të nënshtrojnë”. 7 Sansoni iu përgjigj: “Në rast se më lidhin me shtatë tela të freskët, jo ende të tharë të harkut, unë do të bëhem i dobët dhe do të jem si gjithë burrat e tjerë”. 8 Atëherë princat e filistenjve i sollën shtatë tela të freskët harku, jo ende të tharë, dhe ajo e lidhi me këto tela. 9 Mirëpo kishte njerëz që rrinin në pritë pranë saj, në një dhomë të brendshme. Ajo i tha: “Samson, filistenjtë i ke mbi kokë!”. Por ai i këputi litarët, ashtu si këputet një fije shtupe kur ndien zjarrin. Kështu e fshehta e forcës së tij mbeti e panjohur. 10 Pastaj Delilaha i tha Sansonit: “Ja, je tallur me mua dhe më ke treguar gënjeshtra; por tani, të lutem, më thuaj me çfarë gjëje mund të lidhesh”. 11 Ai u përgjigj: “Në qoftë se më lidhin me litarë të rinj, që nuk kanë qenë përdorur kurrë, unë do të bëhem i dobët dhe do të jem si çdo burrë tjetër”. 12 Prandaj Delilaha mori litarë të rinj, e lidhi dhe i tha: “Sanson, filistenjtë i ke mbi kokë”. Dhe kishte njerëz në pritë në dhomën e brendshme. Ai i këputi litarët që kishte në krahë si të ishin penj. 13 Atëherë Delilaha i tha Sansonit: “Deri tani je tallur me mua dhe më ke thënë gënjeshtra; tregomë me se mund të lidhesh”. Dhe ai iu përgjigj: “Mjafton të thurësh shtatë gërshetat e kokës sime me majën e tezgjahut”. 14 Ajo i thuri dhe i lidhi në shulin e tezgjahut pastaj i tha: “Sanson, filistenjtë i ke mbi kokë”. Por ai u zgjua nga gjumi dhe shkuli shulin nga tezgjahu dhe nga maja. 15 Atëherë ajo i tha: “Si mund të më thuash: “Të dua” kur zemra jote nuk është me mua? Tri herë me radhë je tallur me mua dhe nuk më ke treguar ku qëndron forca jote e madhe”. 16 Tani, meqenëse ajo e bezdiste çdo ditë me fjalët e saj dhe nxiste me ngulm, ai u zemërua për vdekje 17 dhe ia çeli asaj tërë zemrën, duke thënë: “Kurrë nuk ka kaluar brisku mbi kokën time, sepse jam një nazire i Perëndisë, qysh në barkun e nënës sime; po të rruhesha, forca ime do të ikte, do të bëhesha i dobët dhe njësoj si gjithë burrat e tjerë”. 18 Kur Delilaha u bind që ai ia kishte çelur plotësisht zemrën, dërgoi të thërrasin princat e filistenjve dhe ua dërgoi këto fjalë: “Ejani lart këtë radhë, se ai ma hapi tërë zemrën e tij”. Atëherë princat e filistenjve u ngjitën tek ajo dhe morën me vete paratë. 19 Pastaj ajo e vuri në gjumë mbi gjunjët e saj, thirri një njeri që i rroi të shtatë gërshetat e kokës së Sansonit; pastaj filloi ta trajtojë keq dhe fuqia e tij e la. 20 Atëherë ajo i tha: “Sanson, filistenjtë i ke mbi kokë”. Ai u zgjua nga gjumi dhe tha: “Unë do t’ia dal si herët e tjera, do të shpengohem”. Por ai nuk e dinte që ZOTI e kishte braktisur. 21 Dhe filistenjtë e zunë dhe i nxorën sytë; e zbritën në Gaza dhe e lidhën me zinxhirë prej bronzi. Dhe e vunë të rrotullojë mokrën në burg. 22 Ndërkaq flokët e kokës, pasi u rruan, filluan përsëri të rriten.

Ndërsa populli i Izraelit bëhet përherë e më imoral gjatë kohës së librit të Gjyqtarëve, kjo reflektohet edhe në vetë gjyqtarët. Çdo gjykatës pasues ka përherë e më shumë të meta se gjykatësi para tij. Për më shumë, çlirimet që arrijnë janë veçse periudha të shkurtra paqeje dhe qetësie për tokën e Izraelit. Këto dështime e bëjnë lexuesin të dëshirojë për një Shpëtimtar përfundimtar i Cili do të sjellë prehje të vërtetë për popullin e Perëndisë; Mesia i premtuar (Zanafilla 3:15), i Cili shpengon popullin e Tij përgjithmonë. Sansoni është gjykatësi i dymbëdhjetë dhe i fundit i përshkruar te Gjyqtarët. Sansoni vjen nga fisi i Danit. Dani është biri i Jakobit dhe shërbëtores së tij Bilhas. Dyanshmëria është karakteristikë e Danit. Ai do ta gjykojë Izraelin, por do të tregojë edhe karakteristika të gjarprit, shih Zanafilla 49:17. Kjo dyanshmëri (ose gjysmësi), karakterizon edhe Sansonin; ai është në fakt gjykatës i Izraelit, por ai shpesh ndjek edhe tendencat e zemrës së tij mëkatare. Duke bërë kështu, ai heq dorë përfundimisht nga dhuntia e Perëndisë; forca e tij e madhe. Përpara lindjes së tij, Engjëlli i Zotit thotë se Sansoni do të jetë një nazireas; dikush që i përkushtohet Perëndisë. Kreu i tij nuk duhet të preket nga brisku, ai nuk duhet të përdorë pije të forta ose ushqim të papastër, si shenjë e shërbesës së tij Nazirease. Në ditët e Sansonit, filistinët kërcënojnë të pushtojnë Izraelin. Por ai do të “fillojë të çlirojë Izraelin nga duart e Filistenjve”, Gjyqtarët 13:5. Kur Fryma e Zotit derdhet mbi të, ai merr fuqi fizike të madhe. Sansoni me anë të fuqisë së tij të madhe vret shumë filistenj. Në të njëjtën kohë ai është i dobët. Ai nuk mund t’i rezistojë tundimeve të grave filistine. Kur filistinja Delilah ngulmon që t’i tregojë asaj se ku qëndron sekreti i fuqisë së tij të madhe, Sansoni vërtetohet krejt i dobët, sa më në fund i zbulon asaj sekretin. Delilaha i rruan flokët e tij të gjatë – shenjë e shërbesës së tij nazirease – dhe kjo shkakton rënien e tij. Fryma e Shenjtë e braktis atë, Sansoni humbet fuqinë e tij, lirinë dhe shikimin e tij. Në të njëjtën kohë Sansoni përmendet diku tjetër në Bibël si dikush që (po ashtu) veproi me besim: Hebrenjve 11:32-34 : 32 Dhe ç’të them më? Sepse nuk do të mjaftonte koha, po të doja të tregoja për Gedeonin, Barakun, Sansonin, Jefteun, Davidin, Samuelin dhe për profetët, 33 të cilët, me anë të besimit gjunjëzuan mbretëri, vepruan drejtësi, arritën premtime, ua zunë grykën luanëve, 34 fikën fuqinë e zjarrit, shpëtuan nga tehu i shpatës, u bënë të fuqishëm prej dobësisë, u bënë të fortë në betejë, thyen ushtritë e huaja.

• Shpërndaje më tej Facebook
• Shpërndaje më tej Twitter
• Shpërndaje më tej Linkedin
• Shpërndaje më tej Pinterest
• Shpërndaje më tej Instagram