Davidi i kursen jetën Saulit.

1 Samuelit 24 1 Kur Sauli u kthye nga ndjekja e filistenjve, i njoftuan sa vijon: “Ja, Davidi është në shkretëtirën e En-Gedit”. 2 Atëherë Sauli mori tri mijë njerëz të zgjedhur nga tërë Izraeli dhe shkoi të kërkojë Davidin dhe njerëzit e tij përballë shkëmbinjve të dhive të egra. 3 Me të arritur në vathët e deleve gjatë rrugës ku ndodhej një shpellë, Sauli hyri brenda saj për të bërë një nevojë natyrore (Davidi dhe njerëzit e tij ishin në fund të shpellës). 4 Njerëzit e Davidit i thanë: “Kjo është dita gjatë të cilës Zoti të thotë: “Ja, unë po ta dorëzoj në dorën tënde armikun tënd; bëj me të ç’të duash”. Atëherë Davidi u ngrit dhe pa diktuar preu një cep të mantelit të Saulit. 5 Por pas kësaj Davidit i rrahu zemra, sepse i kishte prerë cepin e mantelit Saulit. 6 Kështu u tha njerëzve të tij: “Më ruajttë ZOTI nga kryerja e një veprimi të tillë kundër zotërisë tim, kundër të vajosurit të ZOTIT, nga shtrirja e dorës sime kundër tij, sepse është i vajosuri i ZOTIT”. 7 Me këto fjalë Davidi i ndali njerëzit e tij dhe nuk i la të hidhen kundër Saulit. Pastaj Sauli u ngrit, doli nga shpella dhe vazhdoi rrugën e tij. 8 Pas kësaj edhe Davidi u ngrit, doli nga shpella dhe i thirri Saulit, duke thënë: “O mbret, o imzot!”. Atëherë Sauli u kthye nga Davidi uli fytyrën përtokë dhe u përul. 9 Davidi i tha Saulit: “pse dëgjon fjalët e njerëzve që thonë: “Davidi kërkon të të bëjë keq?”. 10 Ja, sot sytë e tu panë që ZOTI të kishte dorëzuar në duart e mia në atë shpellë; dikush më tha të të vras, por unë të kurseva dhe thashë: “Nuk do ta shtrij dorën kundër zotërisë tim, sepse është i vajosuri i ZOTIT”. 11 Veç kësaj, o ati im, shiko në dorën time cepin e mantelit tënd. Në rast se kam prerë cepin e mantelit tënd dhe nuk të kam vrarë, mund të kuptosh dhe të bindesh që nuk ka në veprimet e mia ligësi, as rebelim dhe se nuk kam mëkatuar kundër teje; por ti po më kurdis gracka për të më hequr jetën! 12 ZOTI le të vendosë midis teje dhe meje dhe ZOTI le të marrë hakun kundër teje; sepse unë nuk do ta ngre dorën kundër teje. 13 Ashtu si thotë proverbi i lashtë: “Ligësia vjen nga të ligjtë”. Por unë nuk do ta shtrij dorën time kundër teje. 14 Kundër kujt ka dalë mbreti i Izraelit? Kë po përndjek? Një qen të ngordhur, një plesht? 15 ZOTI le të jetë gjykatës dhe le të sigurojë drejtësi midis meje dhe teje; të mund të shohë dhe të mbrojë çështjen time, të më japë hak, duke më liruar nga duart e tua”. 16 Kur Davidi mbaroi së thëni këto fjalë Saulit, ky i tha: “Ky është zëri yt, biri im David?”. Dhe Sauli ngriti zërin dhe filloi të qajë. 17 Pastaj i tha Davidit: “Ti je më i drejtë se unë, sepse më ke bërë të mira, kurse unë të kam bërë të këqija. 18 Ti sot tregove që je sjellë mirë me mua, sepse ZOTI më kishte lënë në duart e tua, por ti nuk më vrave. 19 Kur, pra, një njeri takon armikun e vet dhe e lë të shkojë në paqe? ZOTI të dhëntë të mira për atë që më ke bërë sot. 20 Tani e di me siguri që ti do të mbretërosh dhe që mbretëria e Izraelit do të jetë e qëndrueshme në duart e tua. 21 Prandaj betomu në emër të ZOTIT që nuk do t’i vrasësh pasardhësit e mi pas meje dhe nuk do ta fshish emrin tim nga shtëpia e atit tim”. 22 Davidi iu betua Saulit. Pastaj shkoi në shtëpinë e vet, ndërsa Davidi dhe njerëzit e tij u ngjitën në fortesë.

Te 1 Samuelit 16, Perëndia vajosi Davidin, personin që do të ishte paraardhësi i Mesias, si mbret. Davidi vjen nga fisi i Judas. “Skeptri nuk do t’i hiqet Judës, as bastuni i komandimit nga këmbët e tij, derisa të vijë Shilohu; dhe atij do t’i binden popujt”. Zanafilla 49:10. Mbreti Saul e di që është hedhur poshtë nga Perëndia; 1 Samuelit 15:26. Ai dyshon se Davidi do bëhet mbret në vendin e tij. 1 Samuelit 18:8. Ai do që ta vrasë Davidin për hakmarrje dhe xhelozi. Te 1 Samuelit 24, Davidi është larguar nga Sauli. Pasi është fshehur fillimisht në vende të tjera, tani ai fshihet, bashkë me 600 burra, në oazën Ein-Gedi, në shkretëtirën Judease, afër Detit të Vdekur. Saul e ndjek atë me 3000 nga burrat e tij më të fortë. Davidi dhe burrat e tij fshihen në një shpellë të madhe. Pikërisht në atë shpellë Sauli vjen të kryejë nevojat. Davidi ka mundësinë ta vrasë Saulin; në fakt Perëndia e vuri në dorën e tij. Por Davidi tregon respekt për Saulin si mbreti i vajosur i Perëndisë. Edhe pse Davidi është vajosur tashmë mbret mbi Izraelin, ai pret për kohën e Perëndisë dhe nuk pëson faj gjaku. Davidi e tregon vetveten si parafytyrim i Jezusit, Mesias. Ai qëndron i vendosur në sprovën e tij, ashtu siç bën Jezusi më vonë. Mateu 4:11. Ai i shfaq dashuri armikut të tij dhe e bekon atë që e mallkon. Mateu 5:44. Jezusi lutet për ata që e kryqëzojnë Atë. Luka 23:34. Si Davidi, Jezusi po ashtu vuan përpara se të lartësohet si Mbret. Atëherë Davidi e vë para përgjegjësisë Saulin. Ai vërteton se nuk ia do të keqen Saulit duke i treguar cepin e mantelit të Saulit, të cilin e ka prerë. Ai i bën thirrje Zotit i cili është Gjykatësi i gjithëdijshëm mes Saulit dhe atij. Kjo histori tregon se Perëndia e mbrojti jetën e Davidit. Ai e bëri këtë me qëllim që të themelohej shtëpia mbretërore e Davidit si dinastia që do të prodhonte Mbretin e Përjetshëm dhe Mesian. Me këtë synim Zoti bëri besëlidhje me Davidin: 2 Samuelit 4:16 : “16 Shtëpia jote dhe mbretëria jote do të bëhen të qëndrueshme përgjithnjë para meje dhe froni yt do të jetë i qëndrueshëm përgjithnjë.” Shih gjithashtu: Isaia 9:5-6 ‘5 Sepse na ka lindur një fëmijë, një djalë na është dhënë. Mbi supet e tij do të mbështetet perandoria dhe do të quhet Këshilltar i admirueshëm, Perëndi i fuqishëm, Atë i përjetshëm, Princ i paqes. 6 Nuk do të ketë të sosur rritja e perandorisë së tij dhe paqja mbi fronin e Davidit dhe në mbretërinë e tij,për ta vendosur pa u tundur dhe për ta përforcuar me anë të mençurisë dhe të drejtësisë, tani dhe përjetë. Këtë ka për të bërë zelli i Zotit të ushtrive. Jeremia 23:5-6 “5 Ja, ditët po vijnë”, thotë Zoti, “në të cilat do të ngre nga Davidi një filiz të drejtë, që do të mbretërojë si mbret, do të ketë mbarësi dhe do të ushtrojë gjykimin dhe drejtësinë në vend. 6 Në ditët e tij Juda do të shpëtohet dhe Izraeli do të qëndrojë në siguri. Ky do të jetë emri me të cilin do të thirret: “Zoti drejtësia jonë”. Jeremia 33:17 “17 Në fakt kështu thotë Zoti: “Nuk do t’i mungojë kurrë Davidit dikush që të ulet mbi fronin e shtëpisë së Izraelit”. Ezekieli 34:23-24 “23 Do të vendos mbi to një bari të vetëm që do t’i kullosë, shërbëtorin tim David. Ai do t’i kullosë dhe ka për të qenë bariu i tyre. 24 Dhe unë ZOTI, do të jem Perëndia i tyre dhe shërbëtori im David do të jetë Princ në mes tyre. Unë, ZOTI, fola”. Psalmi 89:3-4 “3 Unë kam lidhur një besëlidhje me të zgjedhurin tim, i jam betuar Davidit, shërbëtorit tim, duke thënë: 4 “Do ta vendos pasardhjen tënde përjetë dhe do ta ndërtoj fronin tënd për të gjithë brezat”. Selah Mateu 9:27 ’27 Dhe ndërsa Jezusi po largohej prej andej, dy të verbër e ndiqnin duke bërtitur dhe duke thënë: “Ki mëshirë për ne, Bir i Davidit!”.’ Luka 1:32-33 “32 Ai do të jetë i madh dhe do të quhet Biri i Më të Lartit; dhe Zoti Perëndi do t’i japë fronin e Davidit, atit të tij; 33 dhe do të mbretërojë mbi shtëpinë e Jakobit përjetë dhe mbretëria e tij nuk do të ketë kurrë të sosur”.

• Shpërndaje më tej Facebook
• Shpërndaje më tej Twitter
• Shpërndaje më tej Linkedin
• Shpërndaje më tej Pinterest
• Shpërndaje më tej Instagram